Kryetarja e LSI, Monika Kryemadhi, akuzoi qeverinë Rama për paaftësi në menaxhimin e situatës me përmbytjet.
Gjatë një bashkëbisedim me qytetarët në Sauk, Kryemadhi tha se vendi ndodhet në një situatë jashtëzakonisht të keqe nga përmbytjet, ndërsa nga qeveria ka mungese përgjegjshërie dhe aftësie profesionale.
Kryemadhi: Është bërë shumë e vështirë të lëvizësh nëpër Tiranë edhe pse ditë e dielë, prap e vështirë sepse përmbytjet kanë krijuar një situatë jashtëzakonisht të keqe. Ne kemi qenë në kontakt me të gjithë miqte, shokët tanë në të gjithë Shqipërinë, situata ka kaluar çdo limit.
Shikojmë një lloj mungese përgjegjshërie, por edhe aftësi profesionale. Vërtetë jemi në aspektin e prezantimeve dhe organizimit të strukturave tona në të gjithë Shqipërinë për zgjedhjet e 25 prillit, por ajo që po ndjejmë çdo ditë e më shumë është mungesa që kanë njerëzit në infrastrukturë.
Jo veç ekonomia që është rrënuar për shkak edhe të keqqeverisjes, por edhe pandemia ka goditjen e vet. Familjet shqiptare janë varfëruar për shkak të shëndetësisë që është shumë e shtrënjtë për Covidin. Një i sëmurë me Covid shërbimet dhe ilaçet janë jashtëzakonisht të shtrenjta, por gjithë kësaj po i shtohet edhe situata e përmbytjeve.
Ka mijëra hektarë tokë të përmbytur, por jo vetëm tokë bujqësore, por janë edhe me mijëra shtëpi të përmbytura, të cilat nuk shikojnë asnjë lloj përkrahje nga qeveria. Dje pamë një xhiro që bëri mbi një argjinaturë kryeministri, me maskat dhe e vetmja gjë e re që ka sjellë janë stilimet e maskave të tij, por asnjë gjë nuk po shikojmë në jetën e përditshme të shqiptarëve në familjet e tyre.