Parker merr lajme të mira për betejën me kancerin

Mediale Vip

Parker merr lajme të mira për betejën me kancerin

Më: 7 janar 2021 Në ora: 22:56
Tom Parker dhe bashkëshortja e tij

Pjesëtari i grupit muzikor “The Wanted”, Tom Parker, u ka thënë fansave se “ka pasur reagim pozitiv” ndaj trajtimeve për tumor në tru.

Këngëtari e ka lavdëruar NHS-në pasi kishte shkruar në aplikacionin Instagram: “Pakësim i dukshëm: këto janë fjalët që mora sot dhe nuk po mund ta ndal veten duke i thënë vazhdimisht e vazhdimisht”. Duke ia bashkëngjitur edhe një fotografi me bashkëshorten e tij, Kelsey Hardwick, dhe dy fëmijët e tyre, ai kishte shkruar: “Sot është ditë e mirë”. Këngëtari 32-vjeçar kishte zbuluar vitin e kaluar se kishte tumor të paoperueshëm në tru.

Diagnoza erdhi pasi pati dy goditje në tru verën e kaluar. Për shkak të masave kundër COVID-19, bashkëshortja e tij nuk ishte lejuar të qëndronte në spital gjatë tri ditëve të testeve dhe ai i mori lajmet vetë.

Në atë kohë ai kishte thënë se do ta luftonte kancerin “gjatë tërë kohës”. Dy javë më vonë ai u bë baba për herë të dytë, pasi e shoqja Hardwick lindi një djalë.

Të enjten, Parker tregoi për më të rejat rreth gjendjes shëndetësore të tij duke thënë: “Bëra një rezonancë magnetike të martën dhe sipas rezultateve thuhej se kishte pakësim të dukshëm të tumorit dhe trupi po reagon mirë ndaj trajtimit”.

“Nuk mund ta falënderoj mjaftueshëm stafin e Shërbimit Kombëtar të Shëndetësisë”, ka vazhduar ai. “Të gjithë jeni duke kaluar nëpër një kohë të vështirë, por e vlerësoj punën që po e bëni në vijën e parë të frontit”.

Ylli muzikor e ka falënderuar edhe bashkëshorten e tij, duke e quajtur “shtylla ime”, dhe i ka falënderuar fansat për mbështetjen e tyre. “Dashuria, drita dhe pozitiviteti juaj më kanë frymëzuar”, ka shkruar ai. “Çdo mesazh nuk ka kaluar pa u vërejtur dhe më kanë dhënë kaq shumë fuqi”.

Parker preku kulmin e famës në fillim të viteve 2010 si pjesë e grupit muzikor “The Wanted”, duke zënë pozitat e para me këngët “All Time Low” dhe “Glad You Came”.

Pasi që bendi u shpërbë më 2014, ai ka portretizuar rolin e Danny Zukos në një produksion të “Grease” dhe ka shkuar deri në gjysmëfinale në emisionin “Celebrity Masterchef”. Ai është martuar me aktoren Hardwick në vitin 2018.

Sot mund të lexoni Shfletoni kopertinat