Në mbarë botën është rikthyer shpresa se pandemia e koronavirusit do të marrë fund. Të martën, kompania gjermane Biontech shpalli se ka prodhuar një vaksinë efektive kundër koronavirusit.
Ugur Sahin, shefi i kësaj kompanie, ka sqaruar se si do të shpërndahet vaksina në kushtet kur kërkesa është kaq e madhe. “Për ne është e rëndësishme që të gjejmë një proces të ndershëm për shpërndarjen e vaksinës. Pandemia është e pranishme kudo,” tha ai për gazetën gjermane, FAZ.
“Ne kemi kontrata me SHBA, Anglinë, BE-në dhe vende të tjera. Do përpiqemi që të ndajmë dozat në rajone të ndryshme. Gjithçka do relaksohet në vitin 2021, kur do të shtohen kapacitetet prodhuese”.
Sahin thotë se vaksina do të nisë të shpërndahet shpejt. Për këtë vit, kompania shpreson të prodhojë dhe shpërndajë 50 milionë doza. “Misioni ynë është që të përshpejtojmë prodhimin, në mënyrë që të shpërndajmë 1.3 miliardë doza vitin që vjen,” tha ai, duke shtuar se kompania sapo ka blerë një fabrikë prodhimi vaksinash.
Por sa e shtrenjtë do jetë vaksina? Sahin jep shpresa për vendet e varfra. Ai tha se çmimi do të variojë në varësi të fuqisë ekonomke në rajone të ndryshme.
“Pra do jetë çmim me kategori të ndryshme. Edhe sasia e porositur do të ndikojë në çmim. Për vendet e industrializuara, çmimi prej më pak se 20 dollarë për dozë do të jetë objektiv,” tha ai.
Vendimi: As të pasurit dhe as Mbretëresha nuk do e marrin vaksinën të parët
Mbretëresha dhe pjesa tjetër e Familjes Mbretërore në Britaninë e Madhe nuk do kenë privilegjin që të marrin të parët vaksinën kundër koronavirusit të ri. Madje edhe kryeministri Boris Johnson do të duhet të presë radhën. Kështu shkruan e përditshmja Daily Mail.
Sipas saj, askush nuk do të marrë trajtim special kur vendi të nisë aksionin për imunizimin masiv përmes vaksinimit. Një burim qeveritar tha se vaksinat do të shpërndahen vetëm përmës Shërbimit Shëndetësor Kombëtar. Edhe të pasurit nuk do kenë shans që të kapërcejnë radhën.
Rregullorja parashikon që të parët në radhë për të marrë vaksinën do jenë ata që jetojnë në azile.
Më pas do jenë ata mbi 80 vjeç, ku përfshihet edhe Mbretëresha e Anglisë, e cila është 94 vjeç. Pas tyre do të vazhdojnë grupet e tjera të riskut.
Ky vendim vjen pasi kompania Pfizer shpalli se vaksina e tyre ofron 90 përqind mbrojtje ndaj koronavirusit. Kjo vaksinë ka nisur që të prodhohet aktualisht dhe do të nisë të shpërndahet pa u mbyllur viti.