Podujevë: Mbi 250 raste aktive me koronavirus, numri i të shëruarve arrin në rreth 2 mijë

Kosova

Podujevë: Mbi 250 raste aktive me koronavirus, numri i të shëruarve arrin në rreth 2 mijë

Më: 11 janar 2021 Në ora: 00:19
Foto

Të dielën janë regjistruar 31 raste pozitive me COVID-19 në Komunën e Podujevës.

Sipas njoftimit të IKSHPK-së, sot në Podujevë janë konfirmuar 31 raste pozitive. 11 prej tyre janë në qytet, me nga 2 raste ne fshatrat; Katunishtë, Obrançë dhe Balloc dhe me nga një rast në fshatrat; Bradash, Dumnicë e Epërme, Dumosh, Gllamnik, Gërdoc, Letanc, Llapashticë e Epërme, Llugë, Lupç i Poshtëm, Orllan, Pollatë, Sekiraçë dhe Shtedim.

Aktualisht në këtë komunë aktivë me këtë virus janë edhe mbi 250 qytetarë. Kështu ka thënë edhe epidemiologia e Qendrës Kryesore të Mjekësisë Familjare, Bedrie Rama.

“Sot janë konfirmuar 31 raste pozitive me virusin korona në Podujevë. Këto ditë i kemi testuar rreth mbi 100 persona. Numri i personave aktivë me virus janë 256 persona. Kurse, numri i atyre me fatalitet është 40”, është shprehur Rama.

Epidemiologia e Rama ka thënë se edhe 135 qytetarë janë në pritje të rezultateve nga Instituti Kombëtar i Shëndetit Publik.

Që nga fillimi i pandemisë, e deri më tani, numri i të infektuarve në Llap ka arritur në rreth 2 mijë e 500. Deri më tani, janë raportuar 40 viktima, 1993 pacientë janë shpallur të shëruar.

Si pasojë e rënies së lakores më të infektuar të rinj, Komuna e Podujevës ditë më parë është larguar nga zona e kuqe, për të kaluar kështu në zonën e verdhë. Tash në këtë komunë nuk ka orë policore, e cila fillonte nga ora 20:00 dhe vazhdonte gjer në 05:00 të mëngjesit.

Komunat me rrezik të mesëm të infeksionit, e ku bënë pjesë edhe Podujeva, janë ato që kanë prej 76 deri në 149 persona të infektuar në 100.000 banorë. Komunat të cilat bëjnë pjesë në zonën e verdhë, operatorët ekonomikë lejohen të punojnë nga ora 06:00 deri në orën 18:00.

Shërbimet e hotelerisë dhe gastronomisë lejohen të punojnë nga ora 06:00 deri në ora 18:00, pas orës 18:00 punojnë me shërbim “merr me vete” dhe “porosi-dërgesë”.

Qendrat tregtare lejohen të punojnë prej orës 06:00 deri në ora 18:00. Transporti publik në këto komuna lejohet të punojë me 50 për qind të kapaciteteve duke respektuar manualin për mbrojtjen nga përhapja e sëmundjes COVID-19.

Në anën tjetër, në Kosovë sot janë regjistruar edhe 253 raste të reja me koronavirus dhe dy raste të vdekjes.

Në njoftimin e Institutit Kombëtar të Shëndetësisë Publike thuhet se rastet e reja pozitive rezultojnë nga testimi i 1,586 mostrave.

Nurmri i përgjithshëm i të infektuarve me koronavirus në Kosovë ka arritur në 53, 776. Prej tyre, 1,377 pacientë kanë humbur jetën.

Pacientë të shëruar janë 46.259 – prej tyre 646 në 24-orëshin e kaluar, derisa raste aktive me koronavirus aktualisht janë 6.140.

Shfaq komentet
comments powered by Disqus
Sot mund të lexoni Shfletoni kopertinat