Portierja e re e Kombëtares së Kosovës, Kristina Ukaj, e ka nisur me shumë sukses edicionin e ri. Ajo të dielën ishte prej më meritoreve për triumfin e Spono Eagles ndaj Bruehl. Spono Eagles me fitoren 28:27 në Winterthur, fitoi Superkupën e Zvicrës në hendboll.
Ukaj priti goditjen e fundit të lojtareve të Bruehl, në sekondat e fundit të ndeshjes. Ajo qëndroi mes shtyllave gjithë pjesën e dytë dhe pati katër pritje të suksesshme. Dy portieret tjera të Sponos kishin vetëm një pritje.
Pasi edicioni i kaluar në Zvicër është ndërprerë, për Superkupë luajti kampioni i vitit 2019, Bruehli dhe fituesi i Kupës nga viti 2019, Spono Eagles.
Ukaj edhe një herë dëshmoi se është portiere e nivelit të lartë dhe se kontributi i saj te Kosova, së bashku me portieret tjera tona, do të jetë i madh.
Ndeshja e Superkupës është luajtur para 998 shikuesve, duke respektuar masat.
FHK-ja i dëshiron suksese tjera Kristinës dhe e mirëpret në grumbullimin e parë të Kombëtares.