Këtë fundjavë do të garohet në pistën e SPA, ku zhvillohet gara e Çmimit të Madh të Belgjikës në Formula 1. Vjet, në këtë pistë triumfoi Charles Leclerc me Ferrari, në suksesin e tij të parë në Formula 1.
Pista belge është 7.2 kilometra e gjatë, më e gjata në Formula 1, ku shpesh moti është i paparashikueshëm. Edhe për shkak të gjatësisë së saj, ndodh që në disa pjesë të jetë pistë e lagur dhe në disa pistë e thatë, çka kërkon një balancim të mirë të makinës dhe kujdes me gomat.
“Do të jetë e vështirë të fitojmë edhe këtë vit në Belgjikë, por nëse koha do të jetë me shi apo e paqëndrueshme gjatë garës, gjithçka mund të ndodhë. Nëse koha dhuron surpriza duhet të dimë si të përfitojmë, për të arritur suksesin e parë sezonal”, tha Leclerc.
Pritet që temperaturat këtë vit në pistën e SPA të jenë më të ulta se ato të një viti më parë, me pilotët që mund të kryejnë 1 ose 2 ndalesa. Parashikohen edhe reshje shiu, por nuk dihen se kur, në varësi të erës, ndaj mbetet një garë e hapur, të paktën në letër.