Ish-drejtori sportiv i njohur i Formula 1, Flavio Briatore, ka rezultuar pozitiv me Covid-19. Britatore, 70 vjeç, pronari i lokalit të famshëm të natës “Billionare” (në Porto Cervo), është shtruar në spitalin San Raffaele në Milano, në gjendje të stabilizuar.
Briatore ka patur ethe ditën e diel dhe u shtrua në spital për të verifikuar gjendjen e tij shëndetësore, ku dhe u konfirmua se ka dalë pozitiv me koronavirus. Gjithsesi, ai ndodhet në kujdesin e mjekëve.
Fillimisht u mendua se gjendja e tij ishte kritike, por ky lajm është përgënjeshtruar. Briatore është njeriu që hodhi në botën e Formula 1 spanjollin Fernando Alonso dhe konsiderohet si një nga drejtuesit më të suksesshëm të këtij sporti.
Gjithsesi, lokali i tij “Billionare” është mbyllur, pasi është konsideruar një vatër infeksioni, me 63 raste pozitive. Italia ka nxjerrë urdhërin për mbylljen e të gjitha diskotekave dhe lokaleve të natës.