Franca është duke futur orar ndalimi nga ora 21.00-06.00 në disa qytete të mëdha, përfshirë Parisin, në mënyrë që të parandalojë përhapjen e mëtejshme të COVID-19, tha presidenti Emmanuel Macron, duke shtuar se masa do të hyjë në fuqi të shtunën dhe do të zgjasë për katër javë.
"Ora policore do të zgjasë për katër javë dhe ne do t'i kërkojmë parlamentit ta zgjasë atë deri më 1 dhjetor," tha Macron në një fjalim televiziv sonte.
Përveç Parisit dhe zonës më të gjerë të kryeqytetit, ora policore do të vendoset në Lille, Lyon, Marsejë, Grenoble, Montpellier, Saint-Etienne, Rouen dhe Toulouse.
Në praktikë, kjo do të thotë që restorantet, baret, teatrot dhe kinematë do të mbyllen nga ora 21.00.
Macron tha se të gjithë ata që nuk respektojnë masat sanitare do të gjobiten me nga 135 euro.
Qeveria franceze njoftoi se një situatë sanitare emergjente ka qenë në fuqi në të gjithë territorin që nga e premtja në mesnatë për shkak të rritjes së numrit të rasteve të reja me virus.
Gjendja e jashtëzakonshme, e cila u hoq në 10 korrik, lejon futjen e disa masave kufizuese, përfshirë karantinën e popullsisë.
Ndryshe, më shumë se 32.000 njerëz kanë vdekur në Francë që nga fillimi i epidemisë së virusit korona.