Krasniqi akuzon ARKEP-in: Nuk po e parandaloni shitjen e IPKO-s te Serbia

Ekonomi

Krasniqi akuzon ARKEP-in: Nuk po e parandaloni shitjen e IPKO-s te Serbia

Më: 21 korrik 2020 Në ora: 12:15
Komisioni

(E plotësuar) - Lidhur me gjendjen në Telekom pas bllokimit llogarive bankare, ministri i Ekonomisë dhe Ambientit, Blerim Kuçi ka raportuar në Komisionin parlamentar për Ekonomi .

Ai tha se pas një takimi që kanë pasur sot ndërmjet Qeverisë, Telekomit dhe Dardafon, kanë kërkuar nga Dardafon për një marrëveshje që të paktën deri më 1 tetor t’i zhbllokojë llogaritë bankare.

“Marrëveshje s’kemi arritur. ‘Dardafon’ nuk ka dhënë deri tash këtë mundësi që ta bëjë zhbllokimin e llogarive bankare deri më 1 tetor, në mënyrë që të arrihet një marrëveshje nëse është e mundshme. Andaj, po e presim këtë përgjigje ende nga ‘Dardafon LL.C’”, theksoi Kuçi.

***

ARKEP nuk mund të nxjerrë vendime për uljen e tarifave për shërbime telefonike në kohë pandemie për operatorët mobilë në këtë rast për Vala dhe IPKO.

Kështu ka thënë anëtari i Bordit të ARKEP, Shqipërim Pula pas pyetjes që i bëri deputetja Mimoza Kusari-Lila.

“Ne nuk mund të marrim vendime ad-hoc për uljen e tarifave dhe lehtësimit të punës së Telekomit rreth borxheve”, tha Pula.

Kusari-Lila ka kërkuar që në kohë të pandemisë të ulën tarifat për brezin frekuence dhe të ndikojë edhe uljen e çmimeve për qytetarët, të paktën sipas saj për këtë kohë të krizës të shkaktuar nga Covid-19.

***

Nënkryetarja e Kuvendit të Kosovës, Arbërie Nagavci ka kërkuar nga bordi i ARKEP të di se cilat do të jenë veprimet e këtij institucioni pas atij takimi me

kryeministrin dhe me ministrat e linjës.

Ajo po ashtu ka thënë nëse rrezikohet siguria kombëtare, bien poshtë ligjet e ARKEP.

“Çështja e sigurisë kombëtare i tejkalon ligjet dhe rregulloret e ARKEP”, tha Nagavci.

Anëtari i bordit të ARKEP, Shqipërim Pula theksoi se kanë ndërmarrë veprime për zbatimin e bazës ligjore.

Megjithatë, Pula nuk ishte në gjendje t’i përgjigjet më shumë nënkryetares Nagavci.

***

Nënkryetari i parë i Komisionit parlamentar për Ekonomi, Zoran Mojsiloviq nga radhët e Listës Serbe ka thënë se askush nuk ka informata zyrtare për interesimin ose negociatat e Telekomit të Serbisë për blerjen e IPKO-s.

Derisa tha se këto diskutime nga kolegët e tij deputet janë politike, ka pyetur bordin në këtë raportim se a është vetëm Telekom Serbia në garë për IPKO.

“Unë e kuptoj se këto diskutime janë politike. Por më intereson të dijë a është i vetmi Telekomi i Serbisë që ka shpreh interesim për IPKO-n”, ka pyetur Mojsiloviq.

Anëtari i bordit të ARKEP Hazir Hajadri iu është përgjigjur deputetit në fjalë bazuar në raportimet në media.

***

Anëtari i Komisionit për Ekonomi, Memli Krasniqi ka akuzuar bordin e ARKEP-it që asnjë hap dhe asgjë zyrtarisht nuk ka vepruar për ta parandaluar shitjen e IPKO-s Serbisë, që është një kërcënim serioz që mund t’i bëhet vendit.

Krasniqi nga PDK ka fajësuar ARKEP që nuk ka ftuar ende IPKO-në të raportojë për këtë proces.

Ai ka cilësuar këtë proces si një prej problemeve më të mëdha që po i shfaqet Kosovës që nga pas lufta.

“Ju jeni takuar me kryeministrin vetëm pasi ai ka shprehur interesim. Bash asgjë s’jeni duke bërë në këtë drejtim ose s’keni marrë asnjë hap. Keni pas të drejtë të ftoni edhe IPKO-në për këtë pasi po besoj edhe janë të obliguar t’ju raportojnë. Kështu që ju edhe nuk guxoni të votoni pro shitjes së IPKO-s Serbisë. Ju edhe të votoni, ne do ta shfuqizojmë atë vendim. Sepse ju jeni bord i votuar nga Kuvendi”, tha Krasniqi gjatë raportimit të bordit të ARKEP në Komisionin parlamentar për Ekonomi.

***

Ende asgjë zyrtare nuk ka për blerjen e operatorit IPKO nga Telekomi i Serbisë, kështu ka thënë anëtari i bordit të Autoritetit Rregullator të Komunikimeve Elektronike dhe Postare (ARKEP), Shqipërim Pula gjatë raportimit në Komisionin parlamentar për Ekonomi dhe Tregti.

Derisa ka theksuar se për një proces të negociatave ndërmjet Telekomit të Sllovenisë dhe atij të Serbisë janë njoftuar nga mediat.

“As edhe njoftim zyrtar ne si ARKEP nuk kemi për atë që është thënë në media. Por, nevoja e ndërhyrjes së shtetit është e nevojshme gjithnjë për sigurinë kombëtare. Unë personalisht nuk do ta nënshkruaja një licencë të tillë”, tha ai.

Derisa, Pula ka thënë se këto qarkullime në media mund të jenë edhe spekulim, tha se nga 5 korriku ka filluar procesi i shitjes së IPKO-s.

“Nëse ndodhë një dyshim I subjektit vjen kah ne, por meqe neve s’na ka ardhur asnjë njoftim zyrtar ne s’kemi kërkuar informata zyrtare nga IPKO”, tha ai.

Anëtari i komisionit, Hekuran Murati tha se papërgjegjësia e ARKEP është pasi nuk ka kërkuar zyrtarisht procedurat për shitjen e këtij operatori, në këtë rast të IPKO-s.

Derisa Pula ka thënë se ka takuar zyrtarë të Qeverisë për atë që ka qarkulluar në media lidhur me interesimin e Telekomit të Serbisë për IPKO. Ai ka thënë se bordi ka mandat për vendimmarrje është funksional në ARKEP.

Shfaq komentet
comments powered by Disqus
Sot mund të lexoni Shfletoni kopertinat