Ugur Sahin, i cili rrjedh nga një familje modeste, është themeluesi i kompanisë gjermane me vlerë 2 miliardë dollarë BioNTech, por edhe më tej vjen në punë me biçikletë.
Ai dhe gruaja e tij Oezlem Tuereci, gjithashtu anëtare e bordit në BioNTech, kanë dalë në pah si një "ekip ëndërrash" që mund të shpëtojë botën nga koronavirusi.
Në fakt, gara botërore për të gjetur vaksinën kundër Covid-19-shit u rrit në një nivel më të lartë të hënën, kur BioNTech-u dhe American Pfizer-u njoftuan se vaksina e tyre ka një efikasitet prej 90 përqind pas fazës së tretë të testimit klinik.
Sahin, i lindur në Turqi, është rritur në Gjermani, ku prindërit e tij punonin në fabrikën e makinave Ford. Pas mbarimit të kolegjit, Sahin u bë profesor dhe studiues në fushën e imunoterapisë. Ka punuar në spitalet në Këln dhe qytetin e Homburgut, ku u takua me imunologun Tuereci gjatë karrierës së tij të hershme akademike. Kërkimet mjekësore dhe onkologjia janë bërë pasioni i tyre i përbashkët, shkruan Daily Mail.
Oezlem Tuereci, vajza e një mjeku turk i cili gjithashtu erdhi në Gjermani nga Turqia, tha në një rast në një intervistë se edhe në ditën e martesës ata të dy gjetën kohë për të punuar në laborator.
Së bashku kanë studiuar sistemin imunitar si aleat i mundshëm në luftën kundër kancerit dhe u përpoqën të përcaktonin se cila është përbërja unike gjenetike e secilit tumor individual.
Jetën e tyre sipërmarrëse e filluan në vitin 2001 kur themeluan Ganymed Farmacals-in për të zhvilluar antitrupa kundër kancerit, por Sahin, i cili atëherë po jepte mësim në Universitetin e Mainz, kurrë nuk hoqi dorë nga ligjërimi.
Ganynmedi i tyre i është shitur më 2016 Astellas-it të Japonisë për 1.4 miliardë dollarë dhe Sahin dhe Tuereci themeluan së bashku BioNTech-in më 2008 me qëllimin për të arritur një gamë shumë më të gjerë të mjeteve të imunoterapisë në luftën kundër kancerit.
Fondacioni Bill & Melinda Gates ka investuar 55 milionë dollarë në kompaninë e tyre, e cila gjithashtu punon për të trajtuar HIV-in si dhe tuberkulozin.
Sahin dhe gruaja e tij aktualisht janë në listën e 100 gjermanëve më të pasur, shkruan Welt am Sonntag-u gjerman.
Por, përkundër pasurisë së tij, kolegët e tij e përshkruajnë këtë mjek të zellshëm si një njeri të qetë dhe të matur që i shmanget kontrollimit të çmimeve të aksioneve të kompanisë së tij, ndërsa më me dëshirë leximon revista shkencore.
- Pavarësisht të gjitha arritjeve, nuk ka ndryshuar, gjithmonë ka qenë modest dhe i afrueshëm - thotë Matthias Kromayer, anëtar i bordit të MIG AG-së, i cili mbështet financiarisht BioNTech-un, duke shtuar se është normale ta shohësh Sahinin të vijë në takime me xhinse, çantë shpine dhe helmetë biçikletash.
"Është nperson shumë modest, por dëshiron të krijojë një strukturë që do t'ia mundësojë të realizojë vizionet e tij dhe aspiratat e tij nuk janë aspak modeste", tha Matthias Theobald, një tjetër onkolog në Universitetin e Mainzit.
Vaksina e tyre kundër Covid-19-shit mund të bëhet e disponueshme për grupet më të prekshme të njerëzve deri në mars 2021 dhe, së bashku me përparimet e tjera, të ndryshojnë rrënjësisht rrjedhën e pandemisë.
- Ka ende shumë punë, këto janë vetëm rezultate të përkohshme ... por rezultate shumë pozitive që kanë ardhur sot, të cilat, me shpresë, mund të jenë shumë premtuese për të gjithë botën - përfundoi të hënën zyrtari i lartë i Organizatës Botërore të Shëndetësisë Bruce Aylward.