Boksieri i kombëtares së Kosovës, Besart Pireva, me pak fat do të ishte në finalen e madhe të turneut Grand Prix në Zagreb të Kroacisë.
Djaloshi nga Prishtina ka treguar luftë të madhe në ring por jo edhe të dalë triumfues, pasi që edhe u dëmtua paksa nga gjyqtarët, gjithnjë duke iu referuar raportimeve të FBOXK-së.
“Në gjysmëfinale Pireva boksoi kundër boksierit të Kroacisë Leo Cvetkoviq. Edhe pse Pireva ndoshta për një nuancë ishte më i mirë por gjyqtarët fitues e shpallen vendasin Cvetkoviq.

Pireva edhe pse humbi për tre raunde luftoi si luan, sidomos në dy raundet e fundit ka shkëmbyer shumë goditje të forta dhe precize dhe tregoi se është në formë të mirë.
Pireva mbetet me medalje të bronztë, që është një sukses i madh në një turne të fortë me 14 shtete nga tre kontinente”, njofton Federata e Boksit të Kosovës.
Kush është Cvetkoviq? Boksieri kroat ka një përvojë të madhe dhe me shumë medalje ndërkombëtare, për dallim nga boksieri ynë që është i ri dhe nuk ka më shumë se pesë vite që ka filluar karrierën sportive. Cvetkoviq ka zënë vendin e pestë në Kampionatin Botëror në vitin 2016, që u mbajt në St. Petersburg të Rusisë.

Po ashtu ka fituar medaljen e artë në turneun në Tampere të Finlandës pikërisht në vitin 2017, pastaj medaljen e argjendtë në Lojërat Mesdhetare në Tarragano në vitin 2018! I artë në turneun “Dorëza e Artë” në Beograd në vitit 2018, medalje të argjendtë në Targu Jiu të Rumanisë, i bronztë në Hungari në vitin 2018, e shumë e shumë medalje tjera ndërkombëtare.
Pireva sot dëshmoi se është boksier i kalibrit evropian dhe me pak investime, punë dhe menaxhim më të mirë në kampin e Kombëtares, Kosovës do t‘i sjell medalje evropiane apo botërore në te ardhmen. Është boksier me perspektiv, por që duhet përkushtim dhe investim në djaloshin e talentuar dhe që është potencial. Këtë duhet ta ketë parasysh Federata e Boksit të Kosovës.