Legjenda e boksit, Mehmet Bogujevci, megjithatë lajmërohet pas shkrimit: “Mehmet, si sportist i madh, fol burrë, prej kujt po frikësohesh!” Sekretari i përgjithshëm i Federatës së Boksit të Kosovës, tha se nuk është mbi shtetin dhe i respekton vendimet e institucioneve të Kosovës.
“Unë nuk jam mbi shtetin, as mbi Ministrinë e Shëndetësisë, as mbi Ministrinë e Sportit as mbi Komitetin Olimpik të Kosovës, vendimet e tyre i respektojë në maksimum.
Plotësisht i respektojë vendimet e këtyre institucioneve”, tha Bogujevci për gazetën Kombëtare “Bota sot”.
Nënkampioni i botës në boksin amatorë në vitin 1978, tha se është kohë pandemie.
“Në këtë kohë të pandemisë, i mbështes dhe pajtohem plotësisht me vendimet e MSH-së, MKRS-së dhe KOK-ut, mbi të gjitha është shëndeti i sportistit!
Kjo është pandemi, me përmasa gjithë botërore, nuk e ka rrokur veç vendin tonë por krejt botën. Në të gjitha shtetet janë anuluar garat, edhe në ligat më të mëdha evropiane, me përjashtim diku-diku, po flas për boksin.
Për momentin në Kosovë nuk po lejohen organizimet e garave, ne duhet mi respektuar udhëzimet e njerëzve profesionist, që e dinë më mirë se ne situatën dhe ne duhet m’iu besuar ISHPK-së.
Ata e dinë se çka është pandemia, krejt bota po merret me këtë punë, po kërkojnë vaksinë kundër virusit. Shumë rëndë na ka goditur neve sportistëve, sportistët dojnë aktivitete, grumbullim, shoqëri sepse pa publik çfarë sporti është, nuk është sport.
E dimë që krejt botën e ka kaplu kjo krizë dhe shumë shtete janë në këtë situatë. Gati të gjitha federatat, në mënyrat e ndryshme po organizojnë stërvitje dhe grumbullimet, për me ia heq këtë stres sportistëve. Federata e Boksit ka organizuar përgatitje me të gjitha grupmoshat, edhe për femra, që mu ndie me të relaksuar. Me 31 gusht do të shkojmë në bregdetin shqiptar në Durrës. Dhjetë ditë do të qëndrojmë në përgatitje me sportistët, të cilët do t’i mbrojnë ngjyrat e shtetit në kampionatet e ndryshme si tek seniorët ashtu edhe tek juniorët.
Në shtator kemi pasur ftesë nga Bosnja për një garë por u shty për dhjetor. Pa na dhënë leje MSH, MKRS dhe KOK-u, federata jonë nuk guxon me marr asnjë vendim krye në vete, me rreziku shëndetin e sportistëve. Unë jam kundër. Më së miri e ka dëshmu dhe që është i suksesshëm Driton Kuka, që katër muaj është duke u marrë me sportistë, ka shkuar në përgatitje në Kroaci, Shqipëri, Slloveni, janë grumbulluar me ruajt formën por edhe me ruajt një relaksim të sportistët.
Dhjetë herë e kemi ndërruar plan programin e punës sepse po ka masa të ndryshme, edhe ne kemi rënë në ndikimin e pandemisë, as ne nuk e kemi lehtë.
Unë mendoj mënyra më e mirë është me punu si ka punuar Driton Kuka po ashtu edhe federatat tjera me sportistë elitarë, mu grumbulluar dhe mi larguar sportistët prej kafeve, por me qenë nëpër kampe. Nuk ka ende kampe ndërkombëtare, fatkeqësisht.
Kam biseduar me kryetarin e federatës së boksit kroat dhe kah fundi i shtatorit të jemi atje në kamp dhe në një turne.
Nuk mundemi ne me zbuluar asgjë, veç duhen me na leju MSh, MKRS dhe KOK-u, pra ata si vendosin, ne jemi me ta, veç le ta marrin përgjegjësinë ata, nuk ka problem. Gjithë klubet janë duke stërvit në ambientet të hapura, me mbajt formën sepse nuk ka gara ende, kështu që duhet me ruajt elanin dhe moralin e sportistëve”, tha mes të tjera Bogujevci.
Duhet shtuar, se në shtetet e rajonit, pothuajse në të gjitha rangjet kanë filluar garat e futbollit, si në Mal të Zi, Maqedoni të Veriut, Bosnjë dhe Hercegovinë, Kroaci, Serbi etj. a mos vallë se këtu nuk ka pandemi? A mos vallë se, më rrezik qenka të luajmë në fusha dhe palestra sportive, se sa që shohim grumbullim të rinisë nëpër kafiteritë? E pashpjegueshme!