Gjatë 24 orëve të kaluara, në Iran janë regjistruar 2,333 raste të reja të koronavirusit, duke e vazhduar rritjen e përhapjen që filloi në mesin e majit.
Përpos të infektuarve, gjatë kësaj periudhe u regjistruan edhe 216 viktima të reja dhe numri i përgjithshëm i të vdekurve në këtë shtet shkoi në 15,700, shkruan “BBC”.
Irani kishte nisur t’i lehtësojë masat kufizuese në prill pas rënies së numrit të rasteve. I kishte rihapur xhamitë, qendrat tregtare dhe parqet si dhe e kishte lejuar rifillimin e udhëtimeve mes provincave.
Përhapja e parë ishte shënuar më shumë në Qom dhe Teheran, por rritja e re e rasteve është duke u regjistruar në pjesën jugperëndimore, kryesisht në provincën Khuzestan, në kufi me Irakun.
Presidenti iranian, Hassan Rouhani, u ka thënë bashkëvendësve se duhet të vendosin maska në transport publik dhe në vende ku ka shumë njerëz.
Ndërkohë autoritetet lokale në kryeqytet i kanë rikthyer kufizimet ndaj disa bizneseve dhe tubimeve publike.
Irani është vendi më i prekur nga koronavirusi në Lindjen e Mesme dhe një ndër më të prekurit në Azi.